காரைநகர் பிரதேச சபையின் சயேட்சை அணி(வண்டில்) தலைமையிலான நிர்வாகம் ஆட்சிக்கான 16 மாத தவணைக்காலத்தை முடித்துக்கொள்ள இருக்கிறது.

காரைநகர் பிரதேச சபையின் சயேட்சை அணி(வண்டில்) தலைமையிலான நிர்வாகம் ஆட்சிக்கான 16 மாத தவணைக்காலத்தை முடித்துக்கொள்ள இருக்கிறது.

(தயவு செய்து முழுமையாக வாசித்த பின்னர் உங்களது கருத்துக்களை நாகரீகமான முறையில் மட்டும் பதிவிடுங்கள். நன்றி).

06.05.2025 கடந்த வருடம் நடைபெற்ற உள்ளூராட்சி மற்றும் பிரதேச சபைகளிற்கான தேர்தலில் 11 ஆசனங்களிற்கு காரைநகர் பிரதேசத்தில் போட்டியிட்ட ஐந்து கட்சிகள் மற்றும் சுயேட்சை அணி உட்பட்ட எவரும் ஆட்சியமைக்க தேவையான பெரும்பாண்மையான ஆறு ஆசனங்களை பெற்றுக்கொள்ளவில்லை.

ஐந்து கட்சிகள் தலா இரண்டு ஆசனங்களையும் மற்றொரு கட்சி ஒரு ஆசனத்தை மட்டும் பெற்றிருந்தது.

இந்த நிலையில் தலா இரண்டு ஆசனங்களைப் பெற்றுக்கொண்ட மூன்று கட்சிகள் ஒன்றிணைந்து உடன்படிக்கை மூலம் ஆறு ஆசனங்களை ஒன்றிணைத்து 19.06.2025 அன்று பிரதேச சபையில் ஆட்சியை அமைத்துக்கொண்டனர்.

சுயேட்சை அணி(வண்டில் சின்னம்)- மொத்த வாக்குகள்: 1350

தமிழ் மக்கள் கூட்டணி( மான் சின்னம்) – மொத்த வாக்குகள்: 909

அகில இலங்கை தமிழ் காங்கிரஸ்(சைக்கிள் சின்னம்) – மொத்த வாக்குகள்: 833

மேற்படி மூன்று அணிகளும் இணைந்து தலா 16 மாதங்கள் வீதம் பிரதேச சபை தலைமை பதவியான தவிசாளர் பதவிகளை வகிப்பது எனவும் உடன்பாடு அமைத்துக்கொண்டனர்.

அதன் அடிப்படையில் அதிகூடிய மொத்த வாக்குகளைப்பெற்ற சுயேற்சை அணி சார்பாக முதலாவது தவணை 16 மாதங்களும், அடுத்தளவில் தமிழ் மக்கள் கூட்டணி(மான்) இரண்டாவது தவணை 16 மாதங்களும், மூன்றாவதாக தவணை 16 மாதங்கள் அகில இலங்கை தமிழ் காங்கிரஸ்(சைக்கிள்) தலைமையிலும் காரைநகர் பிரதேச சபையில் ஆட்சியமைக்க மேற்கூறிய மூன்று அணிகளும் நம்பிக்கை, நல்லெண்ணம், நல்லாட்சி அடிப்படையில் கட்சி தலைமைகளின் அறிவுறுத்தல்களின் பிரகாரம் ஆட்சியினை அமைக்க உடன்பட்டிருந்தனர்.

அதன் அடிப்படையில் சுயேட்சை அணி(வண்டில்) தலைமையிலான முதலாவது தவணை ஆட்சிக்காலம் எதிர்வரும் ஒக்டோபர் மாதம் முடிவிற்கு வருகிறது.

இரண்டாவது தவணைக்காலமான அடுத்து வரும் 16 மாதங்களிற்கு தமிழ் மக்கள் கூட்டணி(மான்) தலைமையில்(தவிசாளர்) தலைமையில் ஆட்சியமைக்க மேற்படி மூன்று அணிகளும் உடன்படிக்கை அடிப்படையில் தார்மீக ஒத்துழைப்பு வழங்குவார்கள்.

மூன்று அணிகளிற்கு இடையேயான உடன்படிக்கையினை, கட்சிகளிற்கு இடையேயான நல்லுறவை, கூட்டாட்சியில் காரை மக்களிற்கு நம்பிக்கையை, ஆட்சியை பகிர்ந்து கொள்வதில் நாணயத்தையும் காப்பாற்றுவார்கள்.

எதிர்காலத்தில் மேலும் இது போன்ற கூட்டாட்சி அமைக்க வேண்டிய சந்தர்ப்பங்களில் உறுதியான நிலைப்பாடுகளை மேற்கொள்ளவும் எதிர்கால அரசியலில் காரைநகரில் துரோகங்களிற்கு இடமின்றியும், பதவிகளிற்கு ஆசைப்படாமலும், கட்சிகளிற்கு இடையேயான உடன்படிக்கைகளை மீறாமலும், மக்களின் நன்மதிப்பையும் கட்சிகளின் புரிந்துணர்வுகளையும், காரைநகரில் அரசியலே ஆனாலும் சத்தியத்திற்கு உட்பட்டு காரை மக்களின் இறையாண்மைய காப்பாற்றவும் தற்போதைய காரைநகர் பிரதேச சபை ஆட்சி என்றென்றும் உதாரணமாக மேற்படி மூன்று அணிகளும் தமது உடன்படிக்கை கலையாது பாதுகாத்துக்கொள்வார்கள் என்பதை காரைநகர் மக்கள் திடமாக நம்புகிறார்கள்.

காரைநகர் பிரதேச சபைக்கான கடந்த ஆண்டு 06.05.2025 நடைபெற்ற தேர்தலில் வெற்றி பெற்ற பிரதேச சபை உறுப்பினர்கள் அனைவரும் ஏதோ ஒரு வகையில் காரை மண்ணிற்கான சேவையை வழங்கவே மக்களால் தேர்வு செய்யப்பட்டார்கள். ஒவ்வொருவரிற்கும் வேறு வேறான தனித்துவமான திறமைகள் உள்ளன என்பதும் ஆனாலும் தமது கட்சிகளின் தலைமைத்துவத்திற்கு கட்டுப்பட்டு தகுதியானவர்களை (விகிதாசார அடிப்படை) உறுப்பினர்களாகவும், அவர்களில் ஒருவரை தவிசாளராக முன்மொழிவதும் கட்சிகளின் தலைமைப்பீடத்திற்கே உரிய பணியாகும்

மேற்படி மூன்று அணிகளும் ஆட்சியமைக்க போடப்பட்ட உடன்படிக்கையினை தமது தனிப்பட்ட கோபதாபங்கள் அல்லது தமக்குள் ஏற்படுகின்ற முரண்பாடுகள் காரணமாக ஒரு அணியோ அல்லது பிரதேச சபை உறுப்பினரோ மீறுகின்ற பட்சத்தில் காரைநகரில் அடுத்து வரும் தேர்தல்களில் தமது நம்பிக்கை தன்மையினை இழப்பார்கள். காரைநகரில் அவர்களுடைய அரசியல் பணி முடிவிற்கு வரலாம்.

மக்கள் பணியே மகேசன் பணியாக கொண்டு அரசியலில் செயற்படுபவர்கள் நிச்சயமாக அரசியல் நாகரீகத்தையும் காப்பாற்றுவார்கள் என்பதுடன், காரைநகரிற்கு அப்பால் கட்சிகள் மற்றும் அரசியல்வாதிகள் அரசியல் நாகரீகத்து அப்பாற்பட்டும், பதவிகளிற்காக தனித்தனியாக நின்று போரிடுபவர்களைப் பார்த்தால் நிச்சயமாக அனைவரிற்கும் தெரிந்த விடயம் யாதெனில் அவர்கள் மக்களிற்காக மண்ணிற்காக சேவை செய்ய வரவில்லை. தமது பிழைப்புக்காகவும் பதவிகளிற்காகவும் அரசியலுக்கு வந்தவர்கள் என்பது புலனாகும்.

ஆனால் காரைநகரில் நாகரீகமாக, மக்கள் நம்பிக்கைக்குரிய வகையில் கட்சி பேதங்கள் இன்றி கூட்டாட்சி இன்று நடைபெறுகின்றது என்றால் காரைநகரில் அரசியல் நாகரீகம் உண்டு.

மேலும் அறிந்து கொள்ள வேண்டிய தகவலாக….

மேற்படி மூன்று அணிகள் இணைந்து ஆறு ஆசனங்களைக்கொண்டு ஆட்சி அமைத்திருந்தாலும், மேலும் மூன்று அணிகள் பிரதேச சபையிலே ஐந்து ஆசனங்களைக்கொண்டு விளங்குகின்றன.

அவற்றில் தேசிய மக்கள் சக்தி(திசைகாட்டி) 1044 வாக்குகள், இரண்டு ஆசனங்கள்,

ஐக்கிய தேசிய கட்சி(யானை) 604 வாக்குகள், இரண்டு ஆசனங்கள்,

இலங்கை தமிழரசு கட்சி (வீடு) 442 வாக்குகள், ஒரு ஆசனம்.

மேற்படி மூன்று கட்சிகளும் ஆட்சிக்கு வெளியே இருந்தாலும், தற்போதைய கூட்டாட்சி உடன்படிக்கைகளிற்கு உட்படாத கட்சி உறுப்பினர்களாக தற்போதைய பிரதேச சபையில் அங்கம் வகித்தாலும் கடந்த 16 மாதங்களில் தற்போதைய தவிசாளரின் தலைமைத்துவத்திற்கும் தனித்தனியாக தமது கட்சிகளின் சார்பாகவும் காரை மக்களிற்கான பணிகளிலும் கைகோர்த்து இயங்கி வருவதை காண முடியும்.

ஆனாலும் தற்போதைய கூட்டாட்சி உடன்படிக்கை மூலம் நான்கு ஆண்டுகள் ஆயுட்காலம் கொண்ட இந்த பிரதேச சபை ஆட்சிக்காலம் முழுவதும் மூன்று அணிகள் உடன்படிக்கை மூலம் ஆட்சியை முழுவதுமாக நான்கு ஆண்டுகள் பதவியில் இருப்பதை விரும்பாத நிலையில் பல்வேறு வழிகளில் கட்சிகளிற்குள்ளும் தனித்தனியாகவும் பிரிவினை மற்றும் முரண்பாடுகளை ஊக்குவித்து மூன்று அணிகளிற்குள் போடப்பட்ட உடன்படிக்கையினை பதவி ஆசை காட்டியோ அல்லது உட்கட்சி பூசலை உண்டு பண்ணியோ நிச்சயமாக கலைக்க முயல்வர்கள்.(அது தான் அரசியல்) ஆனால் அது போன்ற சம்பவங்கள் நடைபெறுகின்றது என்று கண்டுகொள்ளவில்லை, ஆனாலும் அடுத்து வரும் இரண்டு மாதங்கள் காரைநகர் பிரதேச சபை உறுப்பினர்கள் இடையேயும் காரைநகர் மக்களிடத்திலும் மீண்டும் அரசியல் சூடு பிடிக்கும். ஆனாலும் இறுதியில் நல்லதே நடக்கும்.

அரசியலில் மட்டுமல்ல அரசியல் பேசுபவர்களும் நாகரீகமாக நடந்து கொள்வார்கள் என்று எதிர்பார்ப்புடன் காரை மக்களுடன் ‘எனது ஊர் காரைநகர்’ எதிர்பார்த்து காத்திருக்கின்றது

தற்போதைய காரைநகர் பிரதேச சபை உறுப்பினர்கள் விபரம் வருமாறு.

1. திரு. கிருஷ்ணன் கோவிந்தராஜன்(தவிசாளர்)

2.அப்புத்துரை முரளிதரன்

3. திரு.ஆண்டிஐயா விஜயராசா(உபதவிசாளர்)

4.திரு.கணேசபிள்ளை பாலச்சந்திரன்

5. திரு.சிவஞானம் மனோகரன்

6. திருமதி.டெசிமாலினி சசி தரன்

7. திரு.சுப்பிரமணியம் செந்தூரன்

8. திரு.சிவசோதி ஹரிகரன்

9. திரு. செல்லையா சிவகுமார்

10. திரு.ஹிளியோபற்றா மகேஸ்வரன்

11. திரு.தேவலிங்கம் பரணீதரன்